Top Sport

Facebook Twitter

Дови ја покажа моќта на Дукати на тренинзите во Катар (видео)

Автомото / 16.03.2018

Возачот на Дукати, Андреа Довициозо беше најбрз на двата тренинзи пред првата трка од новата Мото ГП сезона во Катар, победувајќи го италијанскиот сонародник Данило Петручи на вториот тренинг, откако претходно беше минимално побрз од Валентино Роси во Јамаха.

Довициозо, кој лани беше најголем ривал на светскиот шампион Марк Маркез, уште еднаш покажа дека патеката „Лосаил“ одговара на Дукати, победувајќи го Петручи во сателитскиот Прамак Дукати за неверојатни 0.006 секунди во последните минути од сесијата.

Втората сесија од 45 минути се одвиваше под рефлектори, во услови во кои ќе бидат и за трката. Кал Крачлоу во ЛЦР Хонда прв го подобри времето на Довициозо од првиот тренинг, пред Маркез со својата Хонда да избие на врвот со 1:55.043.

Ова беше најдобро време подолго време, пред Алекс Ринс (Сузуки) и Петручи да ги подобрат времињата, пред Довициозо да го постави кругот од 1:54.361. Ринс на крајот беше трет со десетинка заостанување.

Најдобрите три имаа голема разлика пред остатокот од ривалите – Хорхе Лоренцо во второто Дукати беше четврт со половина секунда заостанување. Андреа Јаноне беше петти за Сузуки, пред триото на Хонда, Маркез, Дани Педроза и Крачлоу. По ова следуваа тројца возачи на Јамаха, Жоан Зарко на 10. место меѓу двајцата фабрички возачи Валентино Роси и Маверик Вињалес. Овој пласман значи дека Вињалес, кој лани победи од пол-позиција, пропушта автоматски квалификации во вторите квалификации ако не успее да влезе во топ 10 во утрешната трета сесија.

Scroll to Top