Top Sport

Надал без ветувања пред историската шанса

Откако Роџер Федерер потврди дека нема да игра на Мастерсот во Париз, Рафаел Надал има голема шанса да ја заврши годината како светски рекет број 1 првпат од 2013 година.

Федерер и Надал ги освоија сите четири гренд слем турнири оваа година, откако Шпанецот победи по 10. пат на Ролан Гарос и третпат на САД опен, и сега му е потребна само една победа за да го обезбеди првото место на АТП-листата на крајот на годината по четврти пат.

Надал игра со Кореецот Хјеон Чунг во второто коло, откако тој со 6:0/6:2 го победи Миша Зверев, и има шанса да се израмни со Џон Мекинро, Иван Лендл и Новак Ѓоковиќ со четири први места. Федерер и Џими Конорс пет пати имаат завршувано на првото место, а Пит Сампрас е рекордер со шест први места.

„По победата во Шангај и во Базел, нормално дека Роџер ќе се одлучи да се повлече од Париз, поради неговото тело и подготовките за Лондон. Јас како и секогаш сум тука да го дадам мојот максимум. Ова е можеби најважниот град во мојата кариера“, изјави Надал на прес-конференцијата пред турнирот.

И покрај 10-те титули од Ролан Гарос, Надал никогаш нема победено на мастерсот во Берси, и сега може да го помине Новак Ѓоковиќ според бројот на Мастерс 1000 титули – двајцата имаат по 30.

„Видете. Ми треба победа на еден меч. Но, тука сум да победам на повеќе мечеви, исто како на било кој друг турнир. Сезоната не е завршена и имаме работа“, вели Надал.

Scroll to Top