Трет висок пораз во третиот меч за Вардар во првата сезона во Лигата на Европа, откако во Скопје Реал Сосиедад дојде да се надигрува и на крајот си замина со 0:6 победа и три поени.
Ѕвезда на мечот несомнено беше Вилијан Жозе, 25-годишниот бразилскиот напаѓач за кого немаше место во тимот на Реал Мадрид, но своето место си го најде во Сосиедад, и со четири одлични гола покажа дека е одличен голгетер.
Микел Ојарзабал уште во 12. минута го постигна првиот гол за баскискиот тим, по што почна „опсадата“ пред голот на Гачевски, со шанси за Серхио Каналес и Вилијан Жозе. Вардар се охрабри по 20-тина минути игра кога во шанса беа Барсегјан и Бобан Николов, но потоа во 34. минута, Вилијан Жозе за 11 минути постигна уште два гола за убедливи 0:3.
Вилијан Жозе го започна одлично и второто полувреме, кога за само четири минути додаде два гола, првиот со глава во 55. минута, а вториот во 59. минута по грешката на одбраната на Вардар. Тренерот Еузебио Сакристан реши дека Бразилецот направи доволно и со сигурен резултат го повлече од игра во 60-тата минута. Сол на раната постави Алберто дела Беља со гол во 90-тата минута, кога голманот на Вардар, Филип Гачевски по две интервенции не успеа и по третпат да ги спречи напаѓачите на Сосиедад.
За „црвено-црните“ ова е уште еден удар во евро-натпреварувањата, а лошата вест е што следниот меч го игра против истиот противник, на 2 ноември во Сан Себастијан.