Свонси и по понеделникот останува на последното место во Премиер лигата (поради гол разлика), но единствениот велшки тим во англиската елита може да биде горд по импресивната 1:0 победа над Ливерпул.
Ова беше прв пораз за тимот на Јирген Клоп во 19 лигашки и куп натпревари, а дојде откако Алфи Мосон во првото полувреме донесе водство за „лебедите“. Гостите пропуштија низа шанси, вклучувајќи го ударот на Роберто Фирмино во дирекот во финишот на натпреварот. Мо Салах и Садио Мане исто така имаа одлични шанси во второто полувреме.
Ова е прва домашна победа за Свонси под Карлос Карваљал, кој успеа да освои седум поени во четири натпревари, и иако уште се последни, борбата за опстанок во Англија ќе биде многу тешка – шест поени ги делат последните 11 тимови.