Тренерот на Милан, Џенаро Гатузо, дал интересна изјава по синоќешниот пораз на неговиот тим од Арсенал во првиот осмина-финален натпревар во Лига Европа.
Арсенал победи на „Сан Сиро“ со 2:0, со головите на Мхитаријан и Рамзи во првото полувреме. Гатузо и Милан го доживеаја првиот пораз по 13 натпревари во сите натпреварувања.
„Можевме да одиграме и многу подобро, премногу се мачевме, а тие стоеја многу блиску. Не бевме доволно храбри, но мораме да гледаме само напред. Знаеме дека мораме да се бориме до самиот крај, но квалитетот не можете да го купите во супермаркет“, рекол Гатузо.
Во реваншот за една недела, во Лондон, Милан ќе има невозможна мисија да го елиминира Арсенал.
„Со мислите сум насочен кон неделниот натпревар во Серија А, за мечот во Лондон ќе размислуваме од понеделник“, рекол Гатузо.