Тренерот на фудбалерите на барселона, Роналд Куман, рекол дека не постојат никакви проблеми во неговиот тим. Барса, утре вечер, ќе го пречека Реал Сосиедад, кој заедно со Атлетико Мадрид се наоѓа на челната позиција во Ла Лига.
„Атмосферата во тимот е добра. Нема никакво проблем меѓу моите играчи. Свесни сме дека со она што го направивме досега не можеме да бидеме задоволни. Изгубивме некои натпревари што не смеевме да ги изгубиме. Знаеме што треба да правиме до крајот на првенството, треба да покажаме карактер“, рекол Куман.
Реал Сосиедад одлично влезе во сезоната, но на последните три натпревари, три пати одиграа нерешено. На табелата тимот од Сан Себастијан има девет поени повеќе од Барса.
Утре вечер Лео Меси ќе се обиде да го израмни рекордот на Пеле. Бразилецот има постигнато 643 гола за Сантос, Меси гол помалку во кариерата за Барселона.
„Тоа се неверојатни бројки. Нашиот напад зависи од него. Неверојатно е што се има направено за овој клуб“, заклучил Куман.
Барселона и Реал Сосиедад утре натпреварот ќе го започнат од 21 часот.