Менаџерот на Манчестер сити, Пеп Гвардиола најави дека е потребно да се потрошат уште многу пари за неговиот клуб да може да стигне до толку посакуваната титула од Лигата на шампиони.
Од доаѓањето на „Етихад“ во 2016 година, шпанскиот тренер потроши 450 милиони фунти на засилувања, но европскиот поход заврши вчера со 1:2 поразот од Ливерпул во четврт-финалето на елитното натпреварување.
Тој инсистира дека не му се потребни подобри играчи, но не вели дека треба да се извини за трошењето на милиони фунти последните две години и додава дека е потребен поголем буџет да се изгради тим кој може да освојува европски титули.
„Невозможно е да се игра на начинот на кој играме и да се остваруваат резултатите кои ги остваруваме без врвни играчи. Едноставно невозможно. Кога ќе кажете: ‘Пеп, тоа што го направи со Барселона или со Баерн дали беше можно без тие играчи?’, одговорот е едноставен – не е во зможно. Потребни се пари за да се купуваат играчи и да се игра на тоа ниво цело време. Можеби последните две години потрошивме многу, но ако видите последните пет или десет години има тимови и кои трошеа повеќе. Да се остварат резултатите потребни се инвестиции. Не се потребни чуда, а јас не изведувам чуда“, изјави Гвардиола.
За инвестираните 450 милиони фунти, на крајот на сезоната Гвардиола и Сити ќе можат да се пофалат со една титула од Премиер лигата и една од Карабао купот. Сити го играат најдобриот фудбал во Англија последните осум месеци, но предизвикот сега е да се игра подобро во Европа.
„Минатата сезона немавме чувство дека сме подготвени да се натпреваруваме во Европа. Сега, уште не сме тим кој може да освои Лига на шампиони, но направивме чекор напред. Дали инвестицијата е оправдана? Тоа е прашање за претседателот на клубот. Јас сум задоволен од тоа што го направивме оваа сезона“, додава Гвардиола.
ЗАСИЛУВАЊАТА НА ГВАРДИОЛА
Лето 2016
Илкај Гундоган (Борусија Дортмунд), 20 милиони фунти
Нолито (Селта Виго), 13.8 милиони фунти
Лирој Сане (Шалке), 37 милиони фунти
Габриел Жесус (Палмеирас), 27 милиони фунти
Џон Стоунс (Евертон), 47.5 милиони фунти
Клаудио Браво (Барселона), 15.4 милиони фунти
Лето 2017
Бернардо Силва (Монако), 43 милиони фунти
Едерсон Мораеш (Бенфика), 35 милиони фунти
Кајл Вокер (Тотенхем), 45 милиони фунти
Данило (Реал Мадрид), 26.5 милиони фунти
Бенжамин Менди (Монако), 52 милиони фунти
Зима 2018
Ајмерик Лапорт (Атлетик Билбао), 57 милиони фунти