Елена Остапенко, актуелната шампионка на Ролан Гарос, го заврши својот настап во Париз веќе во првото коло. Остапенко е елиминирана од Украинката Катерина Козлова со 5:7, 3:6.
Сензацијата, 66.тенисерка на ВТА листата, ја најави во раната фаза на натпреварот, кога направи брејк за 3:1. Успеа Остапенко да возврати во осмиот гем и да израмни на 4:4, меѓутоа до крајот на сетот беа забележани уште три брејка, два од нив направи Украинката која и го освои сетот.
Ревијата на брејкови продолжи и во вториот сет. Од деветте одиграни гема, шест завршија со брејк, а во таквата игра повторно подбра беше Украинката која со 6:3 го заклучи мечот.
Остапенко која на Ролан Гарос дојде како петта во светот, по завршувањето на турнирот ја очекува пад на листата од неколку позиции.
Козлова во втората рунда ќе игра против Викторија Азаренка или Катерина Синијакова.