Претседателот на Реал Мурсија, Виктор Галвез вели дека следниот менаџер на Реал Мадрид веќе е избран и дека се работи за легендата на клубот, Хозе Марија Гутиерез, попознат како Гути.
„Лос бланкос“ мораат да најдат замена за Зинедин Зидан, кој шокантно замина од клубот една недела откако со клубот освои трета титула во низа во Лигата на шампионите. Гути, од друга страна, е младински тренер во Мадрид, а неодамна доби понуда од шкотскиот прволигаш Сент Мирен. Галвез пак, вели дека се обидел да го донесе Гути во третолигашот Мурсија, пред заминувањето на Зидан да му ги поремети плановите.
„Гути ќе биде тренер на Реал Мадрид, така што не може да дојде во Мурсија. Тој беше тренерот кој го посакував, но само два дена по нашиот состанок, Зидан си даде оставака. Гути ми се јави да ми заблагодари за мојот интерес“, вели Галвез.
Гути, кој имаше над 500 настапи за Реал Мадрид како фудбалер, уште во февруари доби пофални зборови од Зидан.
„Секако дека тој е способен да биде тренер на голем клуб. Се подготвува да биде тренер во иднина и тоа може да биде во Реал Мадрид. Се работи за човек од овој клуб и верувам дека не би отфрлил таква можност“, изјави тогаш Зидан.