ПОРТУГАЛИЈА и Македонија вечерва од 20:45 часот го играат решавачкиот натпревар за пласман на Светското првенство. Македонија е главната приказна на овие дополнителни квалификации, во четвртокот во полу-финалето го елиминираше актуелниот европски првак Италија.
Македонија вечерва, исто како и во четвртокот против Италија, ја има улогата на аутсајдер, но ја има поддршката од целата нација и веројатно огромното мнозинство неутрални набљудувачи кои би сакале да видат уште едно големо изненадување.
На страната на Македонија индиректно застана и познатиот шпански весник „Марка“, кој на денешната насловна страница го објави македонското знаме и ликот на Кристијано Роналдо со наслов „Убијците на великаните му се закануваат на Роналдо“.
