Реконструкцијата на спортската сала „Работнички“ влегува во завршна фаза, а свеченото отворање е закажано за 13 декември, кога ќе се одигра градското кошаркарско дерби „Работнички“ – МЗТ Скопје.
Од Општина Центар информираат дека 80 отсто од реконструкцијата е завршена. Салата е обновена според ФИБА стандарди, со ново осветлување, озвучување и поставен централен семафор. Трибините се во фаза на комплетирање, а сите приоди се целосно изведени.
Во рамките на обновата, тоалетите се целосно опремени, а во тек се подготовки за поставување подно греење. Истовремено се финализираат инсталациите и горниот простор наменет за спортските федерации.
„Ова е нашата сала ‘Работнички’, нашиот храм за победи. Реконструкцијата е во завршна фаза и свечено ќе ја отвориме со натпреварот против МЗТ на 13 декември“, изјави градоначалникот на Општина Центар, Горан Герасимовски.
Натпреварот ќе има симболично значење – соочување на двата најтрофејни клубови и отворање на обновениот дом на „Работнички“.