Камерун нема да биде домаќин на Африканскиот куп на нации во 2019 година поради проблемите и одложувањата со подготовките за континенталниот шампион, објави Африканската фудбалска конфедерација (ЦАФ), и сега ќе се бара нов организатор до крајот на годината.
Одземањето на организацијата доаѓа на само седум месеци пред стартот на шампионатот, а главни фаворити за организација се Јужна Африка и Мароко, и покрај тоа што првенството првпат се игра со 24 тимови. Мароко беше и првичен кандидат за организација на купот, исто како и кандидат за Светското првенство во 2026 година, кое го загуби од САД/Канада/Мексико.
Проблемите во Камерун станаа јасни уште во септември кога се прати инспекција на ЦАФ во земјата. Нацијата во централна Африка има проблеми со безбедноста поради нападите на терористичката организација Боко Харам на северот на земјата и конфликтот меѓу војската и сепаратистите во двата региони во кои се зборува англиски.
Камерун е шампион од последното издание на Африканскиот куп на нации во 2017 година, кога шампионатот се одржуваше во Габон.