Германскиот дефанзивец Матс Хумелс вели дека никогаш не видел толку комплетен и полн тим како тој на селекцијата на Франција.
Светските шампиони Германија во вторник играат пријателска со Франција, во дуел на две репрезентации кои според многумина се првите фаворити за трофејот во Русија следната година. Германија ја победи Франција во четврт-финалето во Бразил во 2014 година, но Французите се одмаздија во полуфиналето на Евро 2016, пред потоа да загубат од Португалија во финалето.
За составот на Франција доста е пишувано, посебно со младите таленти како Килијан Мбапе, Томас Лемар и Усман Дембеле и Хумелс е импресиониран.
„Имаат неверојатна длабочина со млади фудбалери, никогаш не сум видел такво нешто на толку високо ниво. И ние имаме добар состав, но во однос на младите играчи, тие се чекор пред сите. Сензационален тим и први фаворити за титулата. Дури и двајца да им се повредат, имаат избор на сите позиции. Фасцинантно“, вели Хумелс во интервју за „Билд ам зонтаг“.