ПСЖ направи безредие на фудбалскиот пазар со трансферот на Нејмар вреден 222 милиони евра, а потоа и со оној на Мбапе за 180 милиони евра, но поради финансискиот фер-плеј клубот ќе мора да продава во јануарскиот преоден рок.
Долга е листата на играчи кои во јануари ќе можат да заминат доколку за нив стигнат соодветни понуди, но медиумите тврдеа дека ПСЖ има намера и да купува.
Поранешниот играч на мадридски Реал, Асиер Иљараменди, се поврзува со францускиот клуб.
Иљараменди од Реал Сосиедад се пресели во Мадрид во 2013 година, но на „Сантијаго Бернабеу“ никогаш не доби вистинска шанса, поради што по две години се врати во тимот каде што ја почна кариерата.
Изминатата сезона и на почетокот на оваа Иљараменди блеска во тимот на Реал Сосиедад, ја врати формата, а повторно конкурира и за шпанската репрезентација.
Иљараменди е дефанзивен играч во редот за врска и тој според француските медиуми е прва желба на тренерот Унаи Емери.