Маурицио Сари го искористи претставувањето како нов тренер на Јувентус да упати критика до сега веќе поранешниот фудбалер на Челси, Еден Азар, објаснувајќи дека тој предизвикувал многу дефанзивни проблеми за својот тим.
Азар го комплетираше трансферот во неговиот клуб од соништата, Реал Мадрид, и иако многумина го сметаат за еден од најдобрите фудбалери кои играле во Премиер лигата во последната деценија, Сари вели дека Белгиецот правел и многу проблеми и дека тој морал да го смени пристапот кон фудбалот само да му „угоди“ на Азар.
„Моравме да работиме според карактеристиките на Азар, бидејќи тој можеше да биде клучен во еден натпревар. Но, со неговото присуство имавме големи проблеми во организирањето на одбраната“, објасни Сари.
Во уште еден, овојпат „прикриен“ удар за Азар, Сари вели дека во Јувентус ќе работи со подобри фудбалери, потенцирајќи го Кристијано Роналдо.
„Во кариерата работев со некои многу силни фудбалери, но да се работи со Кристијано Роналдо е огромен чекор напред. Сакам заедно да срушиме рекорди“, вели 60-годишниот Сари.