Масимилијано Алегри, инаку поранешен тренер на двата клубови, вели дека утрешното дерби Јувентус-Милан е далеку поважно за „росонерите“ отколку за Јувентус.
„Бјанконерите“ имаат освоено само еден поен во првите три меча од Серија А оваа сезона, додека Милан имаат три победи и се на првото место на табелата.
„Ова е еден од најважните мечеви во сезоната, можеби најважниот. Милан го имаат подобрено тимот во последните две сезони, додека ние имаме големи очекувања, иако мечот е поважен за нив отколку за нас“, вели Алегри.
Алегри се врати во Јувентус по две години ова лето, и признава дека тимот е поинаков.
„Најдов поинаков Јувентус. Не може да се споредува овој тим со тој од минатото. Овој тим има сопствен идентитет, но мораме да станеме вистински тим и да се подобриме во многу делови на играта. Требаше да имаме повеќе поени по првите мечеви, но немаме. По паузата во ноември ќе видиме во каква позиција сме“, додава тренерот.