По комплетирањето на најавениот трансфер на Адама Траоре, Барселона ќе се концентрира на решение на позицијата на напаѓач, но бидејќи првата цел Алваро Мората е „недостапен“, тие ќе се фокусираат на Пјер-Емерик Обамејанг, „отпадникот“ од Арсенал.
Според „Марка“, договорот за Мората, кој е на позајмица во Јувентус од Атлетико Мадрид, станува невозможен бидејќи Атле бараат постојан договор, а не нова позајмица, посебно во директен ривал во Ла лига.
Бидејќи до крајот на преодниот рок во понеделник има само три дена, полесна задача е да се реализира трансферот на 32-годишниот Обамејанг, кој е „замрзнат“ кај „топчиите“ по конфликтот со менаџерот Микел Артета.