Легендата на Евертон, Данкан Фергусон ја одбил понудата на Карло Анчелоти да го следи во Реал Мадрид и да му биде помошник кај „кралевите“, бидејќи се надева дека ќе го добие тренерското столче во клубот од Ливерпул.
49-годишниот Шкотланѓанец беше дел од тимот на Анчелоти на „Гудисон парк“ и по шокантното заминување на Италијанецот, добил понуда да го следи во Шпанија, но тој решил да остане и да се бори за главното тренерско место во клубот, каде што помина 10 години како фудбалер. Досегашниот тренер на Вулверхемптон, Нуно Еспирито Санто е фаворит за местото, но Фергусон очекува тој да добие шанса.
Анчелоти со себе ги понесе клучните луѓе во неговиот тим, вклучувајќи го и синот Давиде, шокирајќи голем број од фудбалерите на тимот, посебно Ришарлисон и Хамес Родригез, кој потпиша со Евертон по убедување на Италијанецот.