Новиот тренер на Наполи, Руди Гарсија чувствува дека му е „судбина“ да го наследи Лучано Спалети, откако имаше слична ситуација во Рома и вели дека кај актуелниот италијански шампион носи баланс на „самоувереност, скромност и амбиција“.
По одлуката на Спалети да замине од Неапол, со Наполи се поврзуваа Луис Енрике, Јулијан Нагелсман, Кристоф Галтие и Винченцо Италијано, но претседателот на клубот, Аурелио де Лаурентис на 15 јуни потврди дека Гарсија се враќа во Серија А седум години по отказот од Рома во 2016, кога беше заменет токму од Спалети.
„Таа судбина ни намигнува. Бев заменет од Спалети во Рома и тука доаѓам по неговата голема сезона во Наполи. Со претседателот ја споделува амбицијата за иднината на клубот. Се заблагодарувам на навивачите за приемот, бидејќи кога дојдов во градот и ги видов сите банери и знамиња, сфатив дека целиот град е горд на овој тим и се надевам дека тоа ќе продолжи“, вели Гарсија.