Холандската фудбалска федрација (КНВБ) објави дека последните 35 минути од дербито помеѓу Ајакс и Феенорд ќе се одиграат во среда без присутна публика, и покрај инсистирањето на Ајакс дека уште постојат опасности.
Во неделата, Ајакс губеа со 0:3 во 55. минута, доживувајќи вистинска срамота пред своите фанови, по што дел од навивачите почнаа да фрлаат факли на теренот. Мечот двапати беше прекинат, по што судијата го откажа мечот. Лутите навивачи на Ајакс го оштетија влезот на теренот и влегоа во пресметка со коњичката полиција која потоа користеше солзавец.
Ова беше ново дно за Ајакс, на теренот и надвор од него, откако четирикратните европски шампиони се во катастрофална форма по заминувањето на тренерот Ерик Тен Хаг. Ајакс не ја прифаќаат одлуката на федерацијата, сметајќи дека уште постои „експлозивна“ атмосфера во Амстердам, додека Феенорд инсистира мечот да продолжи оваа недела.