Иако вечно ќе биде на „другата“ страна во лутото шпанско дерби Барселона-Реал Мадрид, на легендата на Блауграна, Андрес Иниеста не му пречи да го пофали својот стар ривал, Лука Модриќ, нарекувајќи го Хрватот еден од најдобрите фудбалери од средниот ред во историјата.
Иниеста имаше шанси да се сретне во интересни дуели со Реал Мадрид, пред да се пресели во Јапонија во тимот на Висел Кобе, додека Модриќ и на 37 години е незаменлив за тренерот Карло Анчелоти. Иниеста ја признава „генијалноста“ на Хрватот и неговата неверојатна долговечност на највисоко ниво.
„Ние сме играчи од различен профил, но во исто време и слични поради позицијата на теренот, концепцијата на игра и контролирањето на топката. Тој е еден од најдобрите играчи од средниот ред кој било кога ќе го видиме. Вистински репер за неговиот тим и верувајте, не лесно да се поминат толку години во клуб како Мадрид и секогаш да бидете клучни за тимот“, вели Иниеста за „АС“.
Тој исто така призна дека триото на „кралевите“, Тони Крос-Касемиро-Модриќ било во иста класа како триото на Барса со него, Серхио Бускетс и Чави.
„Таа тројка на Мадрид е една од најдобрите во историјата. Освоија толку титули заедно, исто како нас. Задоволството кое го имав кога играв покрај Чави и Буси не се повтори“, објаснува Иниеста.