Проблематичниот хрватски напаѓач Никола Калиниќ во јануари може да се врати во клубот со кој имаше најголем успех, Фиорентина, тврди италијанскиот весник „Кориере дело спорт“.
Калиниќ во моментов е во Рома на позајмица од Атлетико Мадрид со опција за купување, но не успеа да ја поправи формата. Тој нема постигнато гол за Рома, и има само три настапи откако ја скрши коската на ногата против поранешниот клуб Милан.
Според „Кориере“, тренерот Пауло Фонсека веќе не смета на 31-годишниот ветеран и тој може да се врати во Фиорентина или да потпише во Болоња. Калиниќ ја имаше својата најдобра форма во Фиренца, постигнувајќи 33 гола во 84 настапи за Виола.
Но, по ова следуваше катастрофалниот трансфер во Милан, како и проблематичниот настап на Светското првенство во 2018, кога беше исфрлен од тимот од селекторот Златко Далиќ зошто одби да влезе во игра како замена. Хрватите потоа стигнаа до финалето на турнирот без него.