Лионел Меси вели дека Аргентина не се плаши од ниту еден тим на Светското првенство во Катар, но побара навивачите да останат смирени. Аргентинците влегуваат на Мундијалот со серија од 35 меча без пораз, серија која трае од 2019 година и како актуелни шампиони од Копа Америка.
„Албиселесте“ ја бркаат првата светска титула од 1986 година, кога триуфмираше славниот тим под водство на Диего Марадона.
„Сега сме во добра форма и луѓето веднаш се восхитени и очекуваат да се вратиме со купот, но не е така лесно. Светското првенство е многу тешко натпреварување, треба многу работи да се случат да дојдеш до трофејот, а има и други репрезентации кои се во наша ситуација и во добра форма. Ние сме подготвени, ќе се бориме, не ни е страв од никого, бидејќи сме спремни за борба до последната минута“, вели Меси.
Аргентина е во незгодна група со Саудиска Арабија, Полска и Мексико, и Меси посочува дека првиот меч против саудиските аутсајдери ќе биде клучен за шансите за титула.
„Во првите минути од првиот меч, нервите и возбудата се тешки за контролирање. Секогаш е најважен првиот натпревар, бидејќи ако почнеш со победа, тогаш нема толу нервоза. Минатото Светско првенство, почнавме со реми и оттогаш велам дека ако го постигневме тој пенал и побевме целиот турнир ќе беше поинаков“, објаснува Меси.