Реал Мадрид се последниот голем клуб кој покажува интерес за шведскиот напаѓач на Реал Сосиедад, Александер Исак, но баскискиот клуб останува на своето – тој може да замине само ако некој ја плати откупната клаузула од 70 милиони евра.
21-годишниот Исак беше еден од најдобрите шведски репрезентативци на ЕУРО 2020 и иако нема постигнато гол, има асистенција и посебно импресионираше на улогата на „деветка“ при ремито со Шпанија.
Според шпанскиот весник „АС“, Реал Мадрид и Арсенал се најзаинтересирани за Исак, а бонус за „кралевите“ е тоа што фудбалерот е претставуван од агенцијата „Универзал спортс груп“, која го претставува и Лука Модриќ. Исак би бил далеку поефтино решение од Килијан Мбапе или Ерлинг Халанд, двајца фудбалери на радарот на „кралевите“.
Исак дојде во Сосиедад од Борусија Дортмунд во 2019 година, а кариерата ја започна во шведскиот АИК Стокхолм. Тој имаше 16 гола во деби-сезоната, а минатата сезона имаше 17 гола и беше дел од тимот кој ја освои титулата од Копа дел реј во април.