Францускиот напаѓач Лоик Реми постигна два гола за Хетафе да стигне до импресивна 2:1 победа на гости кај четвртопласираната Валенсија, компликувајќи ги шансите на домаќините за пласман во Лигата на шампионите.
Реми прво стрелаше во 16. минута, а потоа и во 46. минута за да ги замолчи домашните навивачи, кои на крајот мораа да се утешат само со намалување на резултатот преку Родриго во 69. минута. Сите надежи за кам-бек беа уништени кога Парехо доби директен црвен картон за удар со лактот во последните 10 минути од мечот.
Ова е втор пораз во низа за „Лос че“ по низата од пет победи, но тие се сигурни на четвртото место со 65 поени, дури 13 пред Бетис. Хетафе се на осмото место.