Селта Виго стигна до интересно 2:2 реми против лидерот Барселона, кој може да жали што втора недела едноподруго одигрува нерешено, по ремито против Валенсија.
Покрај тоа, овој резултат претставува првпат во Ла лига некој да одземе поени од Барселона на „Ноу Камп“ од 3 декември 2016 година, кога Каталонците и Реал Мадрид одиграа 1:1. Во претходните 18 лигашки меча на „Ноу Камп“ Барса имаше 18-0 скор и 70:13 гол-разлика.
Селта дојде во водство во 20-тата минута преку Јаго Аспас, пред само две минути подоцна Лео Меси да израмни. Луис Суарез во 62. минута донесе предност за „Блауграна“, пред Макс Гомез да одговори во 70. минута за вреден поен за Селта.
Барселона останува прва во Ла лига со 36 поени, пет повеќе од Валенсија, додека Селта е на осмото место со 18 поени.