Дефанзивецот Биркир Севарсон реши дека најдобро може да се подготви за првиот настап на Исланд на еден Мундијал со работа во фабрика за пакување сол.
33-годишниот фудбалер на Валур Рејкјавик, вели дека работата во фабриката во исландската престолнина му помогнала да го задржи фокусот и да остане „приземјен“.
„Не можам да седам и да не правам ништо по цел ден. Тоа е досадно и стануваш мрзелив и тоа не ми беше потребно пред Светското првенство“, вели десниот бек Северсон, кој ќе треба да го сопре Лионел Меси и Аргентина во Москва.
Со популација од само 335.000, Исланд се убедливо најмалата нација која се квалификувала на еден Мундијал, а Северсон ги одигра сите минути на сите натпревари на минатото Европско првенство во Франција во 2016, кога Исланд стигна до четврт-финалето. Тој е фудбалерот со најмногу настапи за Исланд – дури 79.
„Ако играш на вакви турнири, тогаш е уште поубаво да си од Исланд, бидејќи сѐ е посебно за тебе. Ако играш за Англија, Бразил или Аргентина, тогаш тоа од тебе е очекувано секогаш. Можеби за нив не е толку посебно колку за нас“, додава Северсон во интервју за „АФП“.
Исланд и Аргентина играат од 15 часот.