Мемфис Депај е талентиран фудбалер и голгетер, но не е Лионел Меси ниту Кристијано Роналдо, оценува Луис ван Гал кој се сомнева дека тој ќе може да се навикне на животот на „Ноу Камп“ по шпекулациите кои го поврзуваат како главно засилување за Роналд Куман.
Депај успеа да ја врати својата репутација на највисоко ниво откако замина од Манчестер јунајтед во Лион во 2017 година. Јунајтед платија 31 милион фунти на ПСВ за неговиот трансфер во 2015, но имаше само 7 гола во 53 настапи за клубот. 26-годишниот Холанѓанец стана стандарден во Лион со 57 гола и 43 асистенции во 139 меча, по што стана интересен за Барселона.
Неговиот сонародник Ван Гал, кој го донесе во Јунајтед во 2015, вели дека тој не е решение за Каталонците.
„Секогаш постои сомнеж. Депај е интересен фудбалер, посебно кога добива слобода за игра, но мора да се навикне на нова култура и нов тим, а првата сезона е најтешка. Видете ги Матијс де Лихт и Френки де Јонг. Депај има талент, но не е Меси, ниту Роналдо“, објаснува Ван Гал.