Огромен дрес на славниот кошаркар Дражен Петровиќ, во чест на 55. роденден на еден од најдобрите европски кошаркари на сите времиња, е поставен на зградата на градското собрание во Шибеник.
Петровиќ, кој поради своите мајстории го добил прекарот кошаркарски Моцарт, е роден на 22 октомври 1964 година, а по тој повод најпопуларниот дрес со број 4 од времето додека играл за Шибенка, го украси неговиот роден град.
Петровиќ ја започна својата кариера во Шибеник, продолжи во Цибона, тим со кој двапати беше европски шампион, а потоа во Реал Мадрид.
Тој подоцна кариерата ја продолжи во НБА-клубовите Портланд и Њу Џерси и беше еден од Европејците што ја урна бариерата на најсилната кошаркарска лига.
Со југословенската репрезентација освои бронзен и сребрен медал на Олимписките игри во 1984 и 1988 година, а со Хрватска сребрен медал во 1992 година.
Тој беше прогласен за најдобар спортист на Југославија во 1985 година.
Почина во сообраќајна несреќа во Германија на 7 јуни 1993 година.