Проблемите на поранешната светска тенисерка број 1, Марија Шарапова со фитнесот продолжуваат, откако Русинката се повлече од Дубаи шампионатот следната недела поради повреда на раката.
30-годишната Шарапова никако да се врати во врвна физичка форма по кам-бекот од 15-месечната допинг-суспензија минатиот април, откако пропушти два и пол месеци со повреда на бутниот мускул, пред во јули да добие повреда на раката. 41-рангираната Русинка настапуваше со вајлд-карта на турнирот во Дубаи, каде што последен пат играше во 2006 година. Покрај Шарапова, од турнирот се повлече и финалистката од САД опен, Медисон Киз поради грип.
Симона Халеп, и покрај повредата на скочниот зглоб, со 6:4/6:3 ја победи Летонката Анастасија Севастова за пласман во четврт-финалето во Катар опен. Романката немаше проблеми со подготвеноста, и со директни 29 победнички топки ја елиминираше 15-рангираната противничка.
Актуелната шампионка, Чехинката Каролина Плишкова пак, загуби со 7:6(4)/6:3 од американската тинејџерка, Кетрин Белис.