Домагој Дувњак (31) го продолжил договорот со Кил. Дувњак во Кил ќе остане и во наредните три сезони, до јуни 2022 година.
„За мене ова е најдобриот клуб во светот“, рекол Дувњак по потпишувањето на договорот.
Капитенот на хрватската репрезентација е столб на Кил, иако многумина предвидуваа дека клубот ќе се откаже од него откако во Кил пристигна Норвежанецот Сандер Сагосен.
Дувњак е играч на Кил од 2014 година. Тој во славниот германски клуб дојде како европски првак со Хамбург, а сезоната претходно бил прогласен за најдобар играч во светот.
Досега со Кил освоил две титули во Бундес лигата, а лани „зебрите“ победија во ЕХФ купот.