Македонската ракометна репрезентација во четврток заминува за Хрватска, каде што стартува Европското првенство во ракомет, меѓутоа нејасно е дали ќе играат во „Арената“ во Загреб по заканата на инвеститорот „Ингра“.
Игор Опенхајм, претседателот на „Ингра“ вели дека се приморани да ги „затворат вратите“ на спортската арена бидејќи градот Загреб и хрватската Влада со месеци не плаќаат кирија за спортското здание, и бидејќи се работи за седум години, долгот порасанал на 2 милиони евра.
Според „Вечерњи лист“, хрватската влада смета дека таа сума треба да е значително помала, по што почнале проверките кои траат повеќе од 6 месеци.
„Поучени од претходното искуство кога по Светското првенство во ракомет ни останаа должни 1.4 милиони куни (околу 190 илјади евра), приморани сме на овој потег и ако не добиеме уплата, тогаш нема да има ракомет“, изјави Опенхајм.
Од Хрватскиот ракометен сојуз велат дека ќе почекаат на коментар додека службено не добијат известување.
Македонија треба да го отвори својот настап на ЕП со меч со Словенија во сабота.