Реал Сосиедад се вратија на првото место во шпанската Ла лига откако со 2:0 ја победија Гранада, покажувајќи милост кон тимот кој пристигна во Сан Себастијан со само седум првотимци и пополнети позиции од јуниорскиот тим.
Гранада добија „наредба“ од Ла лига дека за мечот можат да сметаат само на фудбалерите кои беа негативни на КОВИД-19, но и кои не патуваа во Кипар за мечот од Лига Европа против Омонија Никозија и тренерот Диего Мартинез мораше да смета на јуниорските фудбалери откако беше одбиено нивното барање за одложување.
Ветеранот Начо Монреал во 22. минута донесе 1:0 водство за Сосиедад, за само пет минути подоцна Микел Ојарзабал да зголеми на 2:0 со гол од пенал. До крајот на мечот, Сосиедад имаа уште една шанса од пенал, но Вилијан Жозе не беше прецизен во 54. минута од белата точка.
Со победата, петта во низа, Сосиедад се врати на првото место на табелата со 20 поени, два повеќе од второпласираниот Вилјареал, кој претходно со 3:1 победи на гости кај Хетафе. Гранада се на петтото место со 14 поени.