Рафаел Надал и Данил Медведев експресно изборија пласман во четврт-финалето на Авустралија опен. Меѓу осумтте најдобри е и сонародникот на Медведев, Андреј Рубљов, на кого Каспер Руд му го предаде мечот.
Надал, вториот носител на турнирот, неочекувано лесно, го порази Фабио Фоњини. Два часа и 18 минути му беа доволни на Шпанецот за да забележи победа во три сета (6/4, 6/3, 6/2). Во четврт-финалето Надал ќе игра против победникот од дуелот помеѓу Стефанос Циципас и Матео Беретини.
Медведев, за само 90 минути го порази 192. играч на АТП листата, Мекензи Мекдоналд. Четвртиот носител славеше сп 6/4, 6/2, 6/3. За Медведев ова е 18 победа во низа на АТП турнејата.
Данил во четврт-финалето ќе игра против сонародникот Андреј Рубљов.
Рубљов ги доби првите два сета со 6/2, 7/6, против Каспер Руд, а потоа Норвежанецот го предаде мечот.
Ова е прв пат во историјата на Гренд слем турнирите Русија да има тројца тенисери во четврт-финалето. Вчера, квалификантот Аслан Карацев, направи сензација со пласманот меѓу најдобрите осум.