Првата реакција на УЕФА по формирањето на Европската Суперлига, покрај заканите за суспензија на фудбалерите и на клубовите, е обезбедување на поголем буџет за Лигата на шампионите, откако според „Блумберг“ веќе се преговара со британски инвестициски фонд за сума од 6 милијарди евра.
Според „Блумберг“, УЕФА преговара со „Сентрикус асет менаџмент“ за финансиски пакет од над 6 милијарди евра за реформа на Лигата на шампионите со која би се сопреле плановите за Суперлигата.
Од другата страна, американската банка „Џеј Пи Морган“ потврди дека ќе ја финансира Суперлигата, и првично клубовите ќе добијат грант од 3.5 милијарди евра. Ова значи дека клубовите на стартот ќе поделат 400 милиони евра – во споредба шампионот од Лигата на шампионите минатата сезона доби 19 милиони евра.