Ракометните репрезентативки на Македонија одиграа одличен меч во Никшиќ против Црна Гора во рамки на ЕХФ Евро купот, но повторно загубија, и тоа со резултат 31:30. Пред два дена избраничките на селекторот Савевски во Скопје доживеаја многу поубедлив пораз – 21:29.
Македонските девојки оставија добар впечаток пред се со борбеноста и пристапот на играта, а селекторот им даде шанса на најмладите во составот.
Поранешната ракометарка на ЖРК Вардар, Јованка Радичевиќ со 9 гола беше нерешлива енигма за македонските репрезентативки, додека Ангела Јанкуловска со 8 погодоци беше најефикасна во нашиот табор.
Во вториот натпревар од ЕХФ купот, Норвешка пак беше поуспешна од Словенија, овојпат со 26-21.
Следните предизвици за Македонија во ЕХФ Евро купот се во март другата година против Словенија, а во април и последните два меча против фаворитот, Норвешка.
Фото: РФМ