Третиот носител на Ролан Гарос, Марин Чилиќ успеа да го спречи обидот на кам-бек на Италијанецот Фабио Фоњини за победа од 6:4/6:1/3:6/6:7(7)/6:3 со која обезбеди четврт-финале против Хуан Мартин дел Потро.
Поранешниот шампион од САД опен, Чилиќ, упати 44 директни победнички топки, додека Фоњини двапати добиваше медицинска помош за повредата на скочниот зглоб.
Следен за Хрватот е уште еден екс шампион од Њујорк, Хуан Мартин дел Потро, кој без мака со 6:4/6:4/6:4 го совлада Американецот Џон Изнер за прво четврт-финале од 2012 година. Чилиќ нема најдобар скор против големиот Аргентинец, победувајќи го само двапати во 12 меѓусебни дуели.
И кај дамите се познати последните четврт-финални двојки. Германката Анџелике Кербер со 6:2/6:3 доминираше против последната Французинка на турнирот, Каролине Гарсија за да обезбеди шанса за реванш против Симона Халеп, од која загуби во епското полуфинале од Австралија опен.
Ексшампионката Гарбиње Мугуруза е последна во четврт-финалето, откако Украинката Лесија Цуренко се повлече по само два гема (2:0) поради повреда на бутниот мускул. Мугуруза нема загубено сет на турнирот и ќе игра против двократната шампионка Марија Шарапова за место во полуфиналето.
ЧЕТВРТ-ФИНАЛЕ
МАЖИ
(1) Рафаел Надал (Шпа) – (11) Диего Шварцман (Арг)
(2) Александер Зверев (Гер) – (7) Доминик Тим (Авт)
(3) Марин Чилиќ (Хрв) – (5) Хуан Мартин дел Потро (Арг)
(20) Новак Ѓоковиќ (Срб) – Марко Чекинато (Ита)
ЖЕНИ
(1) Симона Халеп (Ром) – (12) Анџелике Кербер (Гер)
(3) Гарбиње Мугуруза (Шпа) – (28) Марија Шарапова (Рус)
(10) Слоун Стивенс (САД) – (14) Дарја Касаткина (Рус)
(13) Медисон Киз (САД) – Јулија Путинцева (Каз)
Фото: ЕПА