Иако поголемиот дел од поранешните британски возачи и медиуми го осудија однесувањето на Макс Ферстапен на Саудиското ГП како опасно и неодговорно, со што се согласија и стјуардите на трката кои му дадоа две казни, поранешниот светски шампион, Дејмон Хил вели дека Холанѓанецот не згрешил ништо на патеката.
Покрај сите контроверзи на трката, најмногу се истакна судирот на Луис Хамилтон и Ферстапен, кога Холанѓенцот се обиде да го пропушти ривалот по наредба на ФИА, но Хамилтон се пожали дека тој го „тестираше под сопирачки“.
„Возачот кој треба да го пушти другиот треба да го направи тоа најбезбедно што може, но навистина не можам да видам што направи Макс што е толку погрешно. Можеби сопре пребргу, но мислам дека Луис не сакаше да оди покрај него“, вели шампионот од 1996 година.
Хил би сакал шампионатот да се реши без судири, но вели дека нема да има компромиси на последната трка во Абу Даби.
„Трката остави горчлив вкус во устата кај двајцата возачи. Има возачи кои возат бескомпромисно, и Макс е таков. Но, исто така многу е вешт. Луис не се плаши, но очигледно внимава на Макс, и тоа со право“, додава Хил.