Осум натпревари се одиграа изминатата ноќ во НБА лигата. Бруклин ја прекинаа серијата од 11 порази, Никола Јокиќ беше на чекор до нов трипл-дабл, Донован Мичел и Бојан Богдановиќ ја предводеа Јута до шестата победа по ред, а Голден стејт Вориорс го забележаа третиот пораз на последните четири натпревари.
Денвер го победија Орландо Меџик со 121:111. Јокиќ мечот го заврши со 26 поени, 15 скока и седум асистенции.
Јута го декласира Хјустон со 135:101. Донован Мичел постигна 30, а Бојан Богдановиќ 22 поени (четири тројки).
Бруклин Нетс против Сакраменто ја прекинаа серијата од 11 порази. Сет Кари дебитираше за Бруклин со 23 поени. Тој го предводеше тимот до победата 109:95.
Во дербито Клиперси ги поразија Вориорс со 119:104. Теренс Мен со 25, Реџи Џексон со 19 и Ивица Зубац со 18 поени беа најефикасни кај победниците. Вориорс го предводеше Стеф Кари со 33 поени.