Денот пред почетокот на Ол стар викендот, во НБА лигата, го обележа Лука Дончиќ. Словенецот ја потврди одличната форма во дуелот со Њу Орлеанс. Во победата на Далас 125:118, Дончиќ постигна 49 поени.
Далас победата во Њу Орлеанс ја најавија во првата четвртина во која постигнаа 45, а примија 27 поени. Во првите 12 минути Дончиќ постигна 19 поени. На крајот мечот го заврши со 49 поени, 15 скокови и осум асистенции.
Кај Њу Орлеанс дебитираше Си Џе Мекалум. Поранешниот играч на Портланд мечот го заврши со 38 поени.
Брилијантен натпревар одигра и Џоел Ембид. Камерунецот ја предводеше Филаделфија до победата кај шампионот Милвоки 123:120. Ембид забележа 42 поени, 14 скока и пет асистенции. Тобајас Херис и Тајрис Мекси мечот го завршија со по 19 поени.
Ембид го поништи учинокот на Јанис Адетокумбо од 32 поени, 11 скока и девет асистенции.
Мајами славеа победа по продолжението со 111:107 во дуелот со Шарлот. Кајл Лаури се истакна кај Мајами со 25 поени, на спротивната страна Ламело Бол забележа трипл-дабл од 14 поени, 10 скока и 14 асистенции.
Вашинготн победија во Њуорк со 117:103, а ЛА Клиперс го декласираа Хјустон со 142:111.