Фудбалерите на Манчестер јунајтед беа поразени од Реал Мадрид ноќта меѓу средата и четвртокот во Хјустон со 2:0.
Иако одиграа добар натпревар, во таборот на Манчестер јунајтед не можат да бидат задоволни од ефикасноста, која беше еден од главните проблеми во изминатата сезона.
Фудбалерите на тимот од „Олд Трафорд“ имаа неколку добри шанси кои не ги претворија во гол, па Ерик тен Хаг повторно беше запрашан до каде стигнале во напорите да доведат напаѓач.
„Апсолутно ни треба напаѓач. Имаше две работи – првата е пресингот што може да биде подобар од самиот почеток, а втората е постигнување голови. Мислам дека ни требаат повеќе играчи кои можат да одат еден на еден и ги имаме. Маркус Рашфорд, Скот Мектомини, Гарначо, сите имаа еден на еден. Мора да дадете гол од тие ситуации“, изјави Холанѓанецот.
Тој не беше подготвен да зборува за тоа кои се целите на клубот кога се во прашање напаѓачите, иако најмногу се зборува за играчот на Аталанта, Расмус Хојлунд.