Поранешниот играч на Бриж, Тејон Бјукенан, потпиша четири и пол годишен договор со Интер, соопшти денеска италијанскиот клуб.
Интер не ги прецизираше финансиските детали од договорот, а италијанските медиуми објавија дека трансферот на 24-годишниот дефанзивец заедно со бонуси е вреден 10 милиони евра.
Бјукенан ќе биде првиот канадски фудбалер кој ќе игра во Серија А.
Италијанските медиуми објавија дека тој е подготвен да дебитира утре против Верона на „Џузепе Меаца“.
Бјукенан ја започна својата кариера во канадскиот клуб Сигма, а потоа две години играше за Њу Ингланд Револушн, од каде во 2021 година се пресели во Бриж.
За белгискиот клуб одигра вкупно 67 натпревари, постигна пет гола во сите натпреварувања и освои една титула во Белгија.
Интер е прв во Серија А со 45 бодови, два повеќе од второпласираниот Јувентус.