Фудбалерките на Северна Кореја се новите светски шампионики до 17 години.
Во финалето, во Доминиканската Република, на пенали ја шокираа Шпанија која ја бранеше титулата.
По 120 минути беше 1:1, а потоа хероина стана голманката на Северна Кореја, Ју-гјонг Пак.
Најпрво се истакна со одбраните во текот на натпреварот, а потоа во успеа и да одбрани пенал, во пенал рулетот.
Севернокорејките четири пати беа успешни од белата точка, што беше доволно за златото.
„Горди сме затоа што го победивме најдобриот европски тим и станавме најдобриот тим во светот. Победивме поради нашето единство. Уште еднаш научивме дека ако се бориме како еден, победата е неизбежна“, изјави селекторот Сунг-гвон Сонг.
Пеналот за победа го реализираше Рју-ми Канг, додека Ил-чонг Јун погоди за 1:1 во 66. минута, пет минути откако Сегура ја доведе Шпанија во водство.
Ова е трета титула светски првак за Северна Кореја до 17 години, со што се одвои од Шпанија на вечната листа.
Претходните две титули ги освоија во 2008 година во Нов Зеланд и во 2016 година во Јордан.