Жозе Мурињо вели дека амбициите на Манчестер јунајтед сега се еднакви со тие на Евертон, бидејќи ривалите во Премиер лигата ја намалиле разликата меѓу „фаворитите“ и останатите.
На времето на „Олд Трафорд“ се бореа за европски титули (домашните беа речиси гарантирани), додека на „Гудисон парк“ беа задоволни со некој пласман во Европа, но времето менува сѐ – по заминувањето на Сер Алекс Фергусон, Јунајтед никако да се врати на славните патеки, додека Евертон со големи засилувања станува далеку посериозен клуб.
Пред дуелот на двата клуба од северозападот на Англија, Мурињо вели дека е импресиониран што Евертон успеа да донесе низа засилувања – Андре Гомеш, Лукас Дињ и Јери Мина.
„Тие прават неверојатни инвестиции. Знаев дека клубот ќе се движи во таа насока со силни засилувања од Барселона. Тоа е нивото кое Евертон сака да го постигне. Нивните амбиции се многу слични со нашите“, вели Мурињо.
Во овој меч, Мурињо ќе се судри со својот сонародник Марко Силва, човек кој ја заслужил неговата почит.
„Сега и вие го знаете Марко и неговите квалитети. Секогаш сум имал одлични односи со него, дури би кажал дека сме пријатели. Во професионалниот фудбал е тешко да се направи таков однос, бидејќи живото е напорен и не можете да разговарате секој ден, но двајцата добро се согласуваме“, додава Мурињо.
Фото: ЕПА