Американската скијачка Линдзи Вон ја имаше трета операција по сериозната повреда здобиена при пад за време на трката по спуст на Зимските олимписки игри во Милано и Кортина.
Линдзи Вон дојде на Игрите повредена, но решена да се натпреварува и покрај скинатите лигаменти. Желбата не беше доволна, ја заврши трката по само 13 секунди, во големи болки, поради што со хеликоптер беше префрлена во болницата во Тревизо.
Иако е познато дека таа веќе имала две операции, сега кога е извршена третата, нема премногу детали за повредите што ги добила.
Јавноста за третата операција ја информираше самата Вон, која повторно се огласи на Инстаграм.
„Денес ја имав третата операција, која беше успешна.
Зборот успех денес има сосема поинакво значење отколку што имаше пред само три недели.
Напредувам и без разлика колку е бавно сè, знам дека ќе биде во ред. Благодарна сум на сите неверојатни лекари, семејството, пријатели кои беа со мене и за прекрасната можност да ја почувствувам љубовта и поддршката на луѓето од целиот свет.
Исто така, честитки до сите во тимот на САД, до сите спортисти кои ме инспирираат и ми даваат можност да навивам за нив“, рече Вон со фотографија од болницата во Тревизо.