Претседателот на ФИФА, Џани Инфантино, се откажа од предлогот за продажба на дел од комерцијалните права за Светското првенство на приватни инвеститори, по силното противење во рамките на светската фудбалска организација и заканите за бојкот од страна на европските федерации.
Инфантино планираше да основа компанија вредна 20 милијарди долари за управување со комерцијалните работи на ФИФА, вклучувајќи ги Светските првенства за мажи и жени, како и Светското клупско првенство.
Според предлогот, приватните инвеститори би поседувале 20 проценти од сопственоста, а меѓу главните инвеститори беше инвестициски фонд основан од Џошуа Кушнер, помладиот брат на Џаред Кушнер, зет на американскиот претседател Доналд Трамп.
Во изјава објавена во петокот вечерта, Инфантино рече дека предлогот нема да биде имплементиран.
„Внимателно ги слушнав сите мислења и стана јасно дека овој проект предизвика поделби кои, без оглед на нивото на поддршка, повеќе не се во интерес на каузата за која е започнат“, рече Инфантино, претседател на ФИФА.
Кратко пред тоа, имаше јавни критики од двајца високи функционери на ФИФА. Карлос Кордеиро, поранешниот претседател на Фудбалската асоцијација на САД и советник на Инфантино, поднесе оставка во знак на протест.
„Не можам да ја поддржам ФИФА додека размислува за продажба на својот удел во Светското првенство“, рече Кордеиро и ги повика другите високи функционери јавно да го објават својот став.
Неколку часа подоцна, се јави и оперативниот директор на ФИФА, Кевин Ламур, кој оцени дека вработените не се запознаени со деталите за проектот и дека станува збор за иницијатива на еден човек.
„Овој проект не смее да се спроведе. Дојде време фудбалските лидери да ги постават вистинските прашања и да донесат соодветни одлуки“, рече Ламур.
Европската фудбалска унија (УЕФА) претходно објави дека сите 55 нејзини членки се подготвени да го бојкотираат Светското првенство и другите натпреварувања под покровителство на ФИФА доколку планот се спроведе.
Конфедерацијата на Северна и Централна Америка и Карибите (КОНКАКАФ), како и Азиската фудбалска конфедерација (АФЦ), се изјаснија против предлогот.
Инфантино најави дека во наредните денови ќе разговара со сите заинтересирани страни со цел да се најде заедничко решение за понатамошен развој на светскиот фудбал, особено во земјите на кои им е потребна поголема поддршка.
Неуспехот на овој проект би можел да ја ослаби позицијата на Инфантино пред следните претседателски избори на ФИФА.
Сегашниот претседател, кој беше реизбран без противкандидат во 2019 и 2023 година, има право да се кандидира за уште еден четиригодишен мандат според статутот.
Рокот за поднесување на кандидатури завршува на 18 ноември, додека изборите ќе се одржат во март 2027 година во Рабат, Мароко.
Foto/ Depositphotos