Фудбалерот на Пари Сен Жермен и репрезентацијата на Шпанија, Фабијан Руиз, изјави дека би му била чест да ја освои „Златната топка“, која се доделува на најдобриот играч во светот, објавија денес француските медиуми.
Руиз (30) го одбрани трофејот од Лигата на шампионите со Пари Сен Жермен минатата сезона, а пред нешто помалку од еден месец, ја одбрани и титулата во Европскиот Суперкуп со клубот од Париз.
Руиз го освои Светското првенство оваа година со шпанската репрезентација, кое се одржа во САД, Канада и Мексико.
„Сонот на секој фудбалер е да биде индивидуално признаен за сите негови напори. Имав среќа да освојам многу тимски титули, како и неколку индивидуални. Зошто да не сонувам оваа година да се доближам што е можно поблиску до кревањето на тој трофеј, што е нешто навистина посебно? Би ми било чест да ја кренам „Златната топка““, рече Руиз во емисијата „Телефут“ на каналот „TF1“.
Шпанскиот фудбалер имаше проблеми со повреда на коленото на почетокот на годината, што го спречи да игра од јануари до април.
„Не сакам да бидам во центарот на вниманието, но мислам дека можам да си го дозволам тоа оваа година, имајќи ја предвид сезоната, вложениот труд и освоените титули. Што се однесува до тимските успеси, освоив сè. На глобално индивидуално ниво, единствената титула што ми недостасува е „Златната топка““, додаде шпанскиот фудбалер.
Руиз неодамна го продолжи договорот со ПСЖ до 30 јуни 2028 година. Тој е член на клубот од Париз од 2022 година.
„Во однос на трофеите, како и физичката подготвеност, сум на врвот на мојата кариера. Многу се подобрив откако Луис Енрике дојде во ПСЖ“, рече Руиз.
Златната топка ќе биде доделена на 26 октомври.
Foto/ Depositphotos