Поранешните англиски репрезентативци Вејн Руни и Енди Керол би можеле да се најдат на суд поради тврдењата изнесени во автобиографијата на Керол, „Sowning It“, која наскоро ќе биде објавена.
„Енди Керол во книгата наведува дека за време на репрезентативните собири, Руни ги канел соиграчите во неговата хотелска соба на пиво и цигари, што предизвикало остра реакција од поранешниот напаѓач на Манчестер Јунајтед“, пишува „Goal.com“.
Според „The Sun“, правниот тим на Руни испратил остро писмо до издавачите на книгата барајќи целосно повлекување на спорните делови. Во писмото, тие истакнуваат дека тврдењата на Керол се целосно неточни.
Керол опишува во книгата како Руни бил „опкружен со штеки цигари, гајби пиво и шишиња вино“ доставени од хотелскиот персонал, но забележува дека „никој не бил мртов пијан“.
Вејн Руни ги негираше таквите обвинувања за „The Sun“.
„Обично не ги коментирам лагите што се пишуваат за мене, но сега ќе коментирам. Енди знае дека тој и јас никогаш не сме биле вистински пријатели. Го сретнав еднаш случајно на одмор и тоа е сè. Приказната за мене како пиев додека бев со репрезентацијата е чиста фикција. Не знам од каде доаѓа“, рече Руни.
Извор близок до Руни им изјави на медиумите дека тој бил бесен и сметал дека напишаното ја преминало границата. Од друга страна, извор близок до Керол вели дека напаѓачот е изненаден од реакцијата и „нема да биде заплашен да ја промени својата верзија“ на настаните.
Двајцата напаѓачи накратко ја делеле соблекувалната во англиската репрезентација помеѓу 2010 и 2012 година, а заедно поминале вкупно 64 минути на теренот.
Според медиумите, Керол би можел да биде принуден јавно да се извини за да избегне скапи судски постапки. Одлуката дали спорните делови ќе бидат повлечени од книгата сега зависи од него и од неговиот издавач.