Милан и Интер го претставија проектот за нов стадион кој ќе го замени легендарниот Сан Сиро, а во исто време се согласија за еден од најголемите спонзорски договори во историјата на спортот.
Новиот стадион ќе се вика „Џенерали стадион“, а италијанската осигурителна компанија ќе плати дури 650 милиони евра за правото на неговото име во текот на 20 години, открива ESPN повикувајќи се на извори запознаени со договорот.
Ова значи дека гигантите од Милано ќе заработуваат во просек 32,5 милиони евра годишно само од продажбата на правата за името на новиот стадион. Клубовите официјално не ги објавија финансиските детали од договорот, но ја потврдија соработката со „Џенерали“, која ја опишаа како еден од најголемите договори за права за именување на стадиони во светскиот спорт.
ESPN го споредува овој договор со договор склучен во ноември 2021 година, кога Crypto.com ги купи правата за името на спортска сала во Лос Анџелес, позната како „Стејплс центар“, за приближно 700 милиони долари во текот на 20 години.
Во времето на неговото склучување, овој договор се сметаше за најголем договор за продажба на правата за името на спортски објект во историјата.
Заедно со правото на името на стадионот, „Џенерали“ ќе стане и официјален осигурителен партнер на Милан и Интер. Проектот за новиот стадионион е финансиски поддржан од сопствениците на двата клуба, „РедБирд Капитал Партнерс“, кој управува со Милан, и „Оактри“, сопственикот на Интер.
Новиот стадион „Џенерали“ ќе има капацитет од приближно 71.500 гледачи и е дизајниран од архитектонските студија „Фостер + Партнерс“ и „Маника“, предводени од Норман Фостер и Дејвид Маника. Зборуваме за архитекти кои претходно соработуваа на проектот „Лондон Вембли“.
Стадионот ќе има две нивоа трибини кои целосно ќе го опкружуваат теренот. Посебно внимание е посветено на трибините зад головите, кои ќе бидат обликувани како стрмни, непрекинати единици со наклон до 37 степени, така што навивачите ќе бидат што е можно поблиску до теренот.
Надворешноста на стадионот е инспирирана од архитектурата на Милано, особено од познатата градска катедрала. Проектот вклучува препознатлива конструкција во облик на буквата Икс, двојно закривен покрив и модерни енергетски решенија.
Заедно со стадионот, планирано е и реновирање на пошироката градска површина од 281.000 квадратни метри, со јавни површини, зелени површини, продавници, угостителски и забавни објекти.
Изградбата на новиот стадион треба да започне во 2028 година, додека првиот натпревар е закажан за сезоната 2031/32. Реализацијата на проектот сè уште зависи од потребните дозволиа. Минатата година, Милан и Интер купија земјиште од градот за приближно 197 милиони евра, што го отвори патот за изградба на нов објект и рушење на стариот Сан Сиро.
Foto/ AC Milan