Тренерот на фудбалерите на Манчестер сити, Пеп Гвардиола не се откажал од борбата за шампионската титула, иако неговиот тим со натпревар помалку има десет бода помалку од лидерот Ливерпул.
Гвардиола порачал дека е задоволен со освоените 44 бода по 19 одиграни натпревари. Според неговата математика 88 бода би му биле доволни за да ја одбрани титулата.
„Имавме добра есен, освоивме 44 бода. Доколку играме вака и во вториот дел од сезоната на крајот ќе имаме 88 бода. Реално со 88 бода сте шампиони. Имаме бројки што ни ја гарантираат титулата. Изминатите години и со помал број на бодови, во првиот дел од сезоната, се освојувале титули“, рекол Гвардиола.
Манчестер сити денес ќе игра во Саутемптон, а во наредното коло на „Етихад“ ќе го пречекаат лидерот Ливерпул.